Manipuri Compound Wordta Khonthok Hongba

Meiteirolgi tonesi lon asi ngangliba eikhoina kupna neinadri. Eikhoigi longi tonesi mapung oina ahumni khalli. Tone ahum asigi khudam amatang pijage:

pAn (ironba)
mapAn (naidaba)
mapAn (saba)

Masigi wahei ahum (pan, mapan, amasung mapan) asida /p/gi matung illakliba vowel /a/ asi khonthokki arum ayam mannade. Loina khennei. "Pan ironba" gi asina lummi, nemmi. "Mapan saba" gi asina khonthok yangngi, wangngi. Aduga "mapan naidaba" gi asina marakta lei, ayangba, awangba asidagi khara nemmi.

Asumna khonthok yangba amasung nemba asi waheisingsi eikhoina wa ngangbada atoppa waheigi marakta hairabasu samjinnadana tongngan tongngan haiba matamda hongdana lei. Adubu wahei amaga atoppa wahei amaga chumnagi thangnana naknana haibagi nattana wahei punsinnaraga anounba wahei, compound, semlakpa matamdadi, khudam oina wahei ani pullaga compound ama semba matamda wahei anisigi manungda amana atoppa waheidugi anem awanggi matung inna, maduga arum ayang mannanaba hannagi tone adudagi yangthokpa natraga lumsinbagi thouong ama thoki. Asumna mannanaba khonthok hongba asi assimilation koui. Karigumba matamda wahei anidumak khonthok lumba yangba mannana haibada leina khatpada wabadagi khennahannaba hotnaduna lumlambana yangthorakpa natraga yanglambana lumlakpasu yaoi. Asumna khennahanba asina dissimilation koui.

Assimilationgi khudam pijage.

Hi yangba tannabada sijinnariba hi asi yangna honbaga mari leinei. Masadu yangngi haiba natte. Yanglibasi mina hollakpa matamda yangbani. Amabu oiro amabu oiro, yangna honba matamda yanglibasi hi aduni. "Hi" ga "yang(ba)" ga pullaga compound ama semmi. Compound asigi machak oiriba "hi" si khonthok yangngi, aduga "yang" asina khonthok lummi. Anisi pullaga semba "hiyang" dadi "hi" asi arumba "yang" ga mannanaba arumba khonthok onkhre. Masi "Hiyanglam" kouba lam mami adudasu thoki aduga lairikki yaopham takpada sijinnaba "hiram lamai" gi asidasu thoki. Khudam kharagi wani.

Dissimilationgi khudam ama pijage.

Meiteisingna "ipa mari" amasung "ipu mari" asi luna lounei. Prithibida ngallingei matamdagina houjik phoabada phurup ayambana tounabagum Meiteisingsu mapa mapu latpa, mapa mapuna lai oiba, mapa mapubu lai oina loujaba kangbuni. "Lai oikhraba" dagi semlaga "laioikhraba" hainei. Laising asigi marida, mapugi marida, mapagi marida samtharakpa mioi oina masa masabusu lumna lounei. Masi marigi wani. Mari mata. "Mari" gi "ri" asi lumna, khonthok nemna hai. "Ipa mari" gi "ri" asisu lumna hai, "ipu mari" gi "ri" asisu lumna hai. "Ipa mari, ipu mari" haiba asida yaoriba "mari" animak asi maromdom lepchaduna lei. Adubu "pari puri" haina samjillakpadadi "pari" gi "ri" na yangna hai aduga "puri" gi "ri" asina lumna hai. Karigino haibadu yengsi. "Pari puri" da "pa" si lummi. Masiga thangnaba "ri" si kanthokkhisi ngaihakki. "Pu" asi yangngi aduga "ri" asi lummi. "Pu" asi yangngi. "Pari puri" haibasi _arum-^ayang, ^ayang-_arum ni. Masida eikhoigi chin manungda speech organsingna lengthok lengjin toubada hongdo hongjin toubana henna nungngaibadagi variation thokhanba manba ama yaori. Loina yangna haibasu wagani, nungngairoi. Loina lumna haibasu wagani, nungngairoi. Loina mannana haige hotnarabasu thabombidagi thorakpa nungsitna chinda leiringeida oiba phibam aduda arum ayang masana tajakhibani, eikhoina sembada wabanina matam loubajatni. Energy changbajatni. Masigi hotnaba asi thoktringeida speechki airstream process adu thokkhibana hanbajatni. Maram asina maromdom haiba matamda yangna haiba adu compound sembada thokliba phonetic environment adugi matung inna lumthakhiba, natraga maromdom tonganna haiba matamda lumlamba aduna yangthokkhiba, natraga arum ayang hongba changdabadagi masagi masa hannagiga mannana haikhibasi thokpajatni. Amamam haiba matamdadi eikhoina khonthoktu sennaba ngammi. Compoundadi ngamdre. Thouoina tourabasu wai, thouoina toudragadi eikhoigi physiologyna leiriba phonological environment aduda khwaidagi laiba maongda khonthoktu puthoknaba hotnarakpada khonthok hongba yaoraki.

Dissimilationgi atoppa khudam amadi lumna nemna haiba "mei" ga lumna nemna haiba "(ma)ri" gana saba "meiri" asini. Tongan tongan haibada "mei" su masagi nemjaba adumna nemna hai. "Mari" gi "ri" asisu adum nemna hai. Adubu "meiri" hairakpa matamdadi "ri" asi ayangba khonthok onkhre. Mamanggi "mei" haiba adugi arumba khonthoktagi khennahanbani. Similar oihandaba, dissimilar oihanbani.

Khonthok arum ayang hongbagi mathakta piriba khudamsing asi amamam loukhattuna yengbada eikhoina ubasi khonthok honglibasi compound adu sembada head word oiriba adu nattaba amaduni. Khudam oina "meiri" da "mei" asina maruni, aduga "ri" asina meidugi makha taba sense pibani, detail pibani. Aduna mapung oiriba "mei" gi khonthok hongdana detail piba "ri" asida ahongbadu thokpani. "Pari puri" asida "pa" su "pu" su khonthok hongde. Honglibasi "ri" amani. Mapung oibaduna hongdana leibani. "Hiram" haiba asidadi khara khennarap toubra, natraga "(ma)ram" natraga "lam" aduna mapung oiba sense oina louba malli, aduga "hi" aduna karigi lamno haibadu takpa, detail piba machak oina louba malli. Khonthok hongba asidi eikhoigi speechta leire. Masi karamna thoki haiba asi ningthina neinabadi changli. Data mayam khomjillaga neinaba changli. 


Masigi khonthok hongba asi eikhoigi speech neinabada yamna maru oi. Henna maru oiribadi morphology amasung etymology neinarakpadani. Khonthok hongngi haibasi khangdragadi, yangna haiba "hi" dagi lumthakhraga "hiyang" amasung "hiram" hairakpani haibasi khangdragadi honnaba hi ga mari leinana khallaktaduna hi-yai chenba, hi-yaigi maram haibaromda artha sagatnaba hotnarakkadouribani. Matou asumna touragadi eikhoigi morphology amasung etymologyda pungsoi soigadouribani.

Khonthok hongbagi matangda neinagadaba yamna leiri. Mathakki wapham asi wahoudok oina thamjabani. Kanagumba apabana haibiningba leiragadi, mathakta haijariba asida hapchinba yaba leiragadi natraga masi chumlammoidaba malli haibagi khudam eikhoigi speechta thengnabiragadi, madu khangbiragadi makhada ibiraknaba haijari. Eikhoigisi thijillibani. Mateng pangbiragadi eikhoi khudingmakta kannagani.